［泌尿科］最不健康的，其實是醫護人員

星期日返工+自己一個學生，真心絕望到一個點...

好痛苦地開始展開黑仔時光愈來愈忙，愈來愈黑...明明從前的我是多麼的白底= =

一黎就要包辦全場30個病人的obs（量血壓），Q1H（每隔一小時量一次）的竟然佔了1/3 = = 仲要篤6-7個H'stix（血糖）。一返工知道只得我一個，已心有不妙...咁多Q1H，基本上量完一round又差不多下一round...

正所謂黑開有條路，除左呢一堆基本routine要做哂，仲要transfer case（轉病房），admit cases（收症），洗一個有三個wounds既dressing（洗傷口），又瘋狂被醫生要求「借眼」（男醫生為女病人做檢查要有女職員在場，保障醫生及病人的清白），餵飯餵藥，臨收工再round下片（換尿片）...忙到routine都未做完就要做突然被assign的工作...

護士成日叫病人飲多d水，但其實自己就忙到無時間飲水，成朝除左早餐時間，由7am忙到到12 noon先有時間飲下水，仲要借個尿盾先可以坐係廁所蛇一蛇

餵餐最鐘意撩隔離床既伯伯們吹水（通常要你餵既，情況都一般，未必溝通到），成班好似維園呀伯之城市論壇咁，討論買樓問題
唉～依家真係買唔起樓

今日又俾呀伯話我想害佢
事源係佢會走佬，又high fall risk，要著安全衣縛係床上，點知縛佢個陣
伯伯大叫：「救命呀！救命呀！你係咪想我死呀！做咩鬼縛住我呀！你死啦！」
說時遲那時快，伯伯一拳打過黎，幸好小女子與伯伯有一（床）欄之隔，及時避過
HCA姐姐：「伯伯你做咩打人呀！係我縛你，係我做衰人，做咩打姑娘！」
HCA姐姐好好呀！！

日期：15 Feb 2015