［泌尿科］婆婆變人狼？

「人狼」，行內術語，形容日間正常但落日後變得狂野的病人，多數發生在長者身上

今天日落過後，聽到有位婆婆大叫「姑娘」，本能反應衝入去睇下咩事，點知見到呀婆金蟬脫殼（除緊佢身上既保護衣）

婆：「姑娘，你放左我啦，你縛住我唔得架！有人偷左我個袋，入面裝哂我d證件，好重要架，你鬆開我，俾我去捉賊啦」
我：「婆婆，邊個會偷你d證件呀？又唔值錢」
婆：「係囉，佢又用唔著，咁都要偷，真係無陰公啦，你唔可以縛住我架」
我：「婆婆，呢度醫院黎，唔會有人偷你證件，就算有，我地會捉到架」
婆：「你唔好呃我啦，你地捉唔到架，俾我去捉佢啦」

我心諗....婆婆....如果我地都捉唔到，你成一百歲又點會捉到呢？

婆婆屢試不果，大叫救命，唔知既仲以為我蝦呀婆😑好彩大家入黎望一望，知佢係人狼都向我表露一個同情的眼神...

由於呀婆金蟬脫殼太危險，分分鐘跌落床，結果三人合力縛埋佢雙手...

另一個人狼婆婆...

我：「婆婆，夠鐘食藥啦，乖，食左佢，快d好返出院見孫仔」

點知呀婆扮乖，飲左少少，一個唔留神一野噴返d藥出黎
好彩小弟縮得快先無中招

老人家去到咁上下年齡都會返老還童，同小朋友一樣會扭計，要你氹，有時唔激心既時候，其實都好可愛。因為每次見證住轉變為人狼既過程，同人狼不合邏輯的對話，都唔知好嬲定好笑。

有個疑問，點解次次遇到既人狼都係婆婆？
唔知我老左會唔會變人狼？
如果大家第時touch wood係醫院見到我呢隻咁大隻既人狼，真係辛苦大家

日期：28 Jan 2015